පාන් බනිස් කන්න එපා කියන්නේ ඇයි?

පාන් බනිස් කන්න එපා කියන්නේ ඇයි?

0 2020

එක්සත් රාජධානියේ රාජකීය වෛද්‍ය සභාවේ විශේෂඥ වෙද්‍ය අසංග විජයරත්න

දැන් කාන්තාවන් කාර්යබහුල නිසා නිවෙසේ පිළියෙල කරන ආහාර වෙනුවට වෙළෙඳසල්වල ඇති පාන්, බනිස් වැනි ආහාර වර්ගවලට හුරුවෙලා. ඒත් මෙවැනි ආහාර කෙතරම් ඔබට හිතකරද යන වග දෙවරක් සිතා බැලිය යුත්තක්.

අවශෝෂණය ප්‍රමාද වීම
හාල් පිටිවලින් සැකසූ ආහාරවලට සාපේක්‍ෂව බලන විට පාන් පිටි ආහාරවල දිරවීම ප්‍රමාදයි. ශරීරයට අවශෝෂණය වීමට වැඩි කාලයක් ගන්නා නිසා සිරුර තුළ වැඩි වේලාවක් තැන්පත්ව පවතියි.

ශරීර උෂ්ණත්වය ඉහළ යෑම
බටහිර යුරෝපීය රටවල වැවෙන ධාන්‍ය වර්ගවලින් නිපදවන ආහාර ගැනීමෙන් වැඩි වේලාවක් සිරුර තුළ ආහාර රඳවා සිටින නිසා ශරීර උෂ්ණත්වයද වැඩි කරවයි. නමුත් මෙවැනි ආහාර අප වැනි උෂ්ණ අධික රටවලට කොහෙත්ම ගැළපෙන්නක් නොවේ. කාබෝහයිඩේ්‍රට් අධිකව ගැනීමත් සිරුර උණුසුම් වීමට බලපානවා.

දිනකට අවශ්‍ය ප්‍රමාණය
සාමාන්‍යයෙන් ඔබේ ආහාර වේලක දිනකට කාබෝහයිඩේ්‍රට් 55%ත් 65%ත් අතර ප්‍රමාණයක් අඩංගු විය යුතුයි. නමුත් ඔබ ගන්නා පාන් පෙත්තකට බටර්, ජෑම් තවරා ගත් විට එය 85%ක් පමණ වන බව ඔබ දන්නවාද? සමබල ආහාර වේලක තිබිය යුතු සමතුලිත බව මින් නැතිවී යයි.

බෝ නොවන රෝග
අල, පරිප්පු වැනි ආහාර වර්ග සමඟ පාන් කෑම නිසා අවශ්‍ය විටමින්, මිනරල් හා ප්‍රෝටීන් වර්ග ලබාගත නොහැකියි. මේ හේතුවෙන් දියවැඩියාව, අධික රුධිර පීඩනය හා කොලෙස්ටරෝල් වැනි බෝ නොවන රෝග රැසක් ඇතිවෙයි. කාබෝහයිඩේ්‍රට් අධිකව ගැනීමත් බෝ නොවන රෝගවලට හේතුවෙයි.

රුධිර ගත සීනි ප්‍රමාණය වැඩිවෙයි
සාමාන්‍යයෙන් පාන් පෙත්තක සීනි තේ හැඳි 1 1/2ක (ග්ලූකෝස්) ප්‍රමාණයක් අඩංගු වෙයි. බනිස් ගෙඩියක නම් මෙම ප්‍රමාණය සීනි හැඳි 2ක් පමණ වෙයි. පාන් භාගයක සීනි තේ හැඳි 7ක, 8ක පමණ ග්ලූකෝස් අඩංගු වෙයි. මේ නිසා දියවැඩියාව වැනි රෝග ඇතිවී රුධිර ගත සීනි මට්ටම වැඩිවී විවිධ සංකූලතා ඇතිවිය හැකියි.

සංකූලතා
තුවාල සුව නොවීම, රුධිර ගත ඉන්සියුලින් ප්‍රමාණය ඉහළ යෑම හා ශරීරයේ වතුර ප්‍රමාණය අඩු වීමද කාබෝහයිඩේ්‍රට් අධිකව ගැනීමෙන් සිදුවෙයි. කාබෝහයිඩේ්‍රට් ගැනීම ශරීර උෂ්ණත්වය වැඩි කරවන නිසා පිපාසය හා ශරීර උෂ්ණත්වයද වැඩිවෙයි.
පාන්, බනිස් වැනි ආහාර ගැනීම වඩාත් සුදුසු වන්නේ ඒවා සකසා පැය 2 1/2ක් ඇතුළතය.

ව්‍යායාම කරන අයට නුසුදුසුයි
ව්‍යායාම කළ පසු ඔබේ ශරීරයේ අනවශ්‍ය මේද දහනය කර සැහැල්ලු බවක් ගෙන දෙයි. නමුත් ඉන් පසුව ඔබ පාන් වැනි පිටි සහිත ආහාර ගන්නේ නම් එයින් ශරීරයට කිසිදු වාසියක් ඇති නොවේ. තමාගේ වැය වූ ශක්තිය මෙම ආහාර මඟින් උරා ගනියි.

පිටි ආහාර සුදුසු අවස්ථා
පාන් වුවත් තරමක් කර කරමින් (ටෝස්ට්) මේද දහනය කර ආහාරයට ගැනීම වරදක් නැත. පාන් පෙති දෙකක් අතර පිරවුමද පාන් පෙත්තක ගනකමට සමානවම සාදා ගැනීම වැදගත්ය. නමුත් මෙම පිරවුමට අල වැනි කාබෝහයිඩේ්‍රට් අධික ආහාර එක් කර නොගන්න. සලාද, තක්කාලි, මාළු, සැමන් හා ධාන්‍ය වර්ග මේවාට එක්කර ගැනීම වඩාත් සුදුසුයි. මේ සමඟ නැවුම් කිරි වීදුරුවක් පානය කරන්න. ගී්‍රන් ටී හෝ ඉඟුරු තේ පානයක් වුවත් ගත හැකියි. කිරි පිටි හෝ මෝල්ට් පාන ගැනීමෙන් තරබාරුකම ඇතිවිය හැකියි.